DETAJET TRONDITESE/ Shqiptari i arratisur nga burgu gjendet i groposur në një fushë në Greqi

Autoritetet greke kanë gjetur trupin e pajetë të një personi në një fushë bujqësore në rrugën rurale Thivon-Mourikiou të hënën në mëngjes.

Dyshohet se viktima është shqiptar. Kjo pasi me trupin e pajetë janë gjetur edhe disa dokumente, të cilat i përkasin një shqiptari megjithatë ende nuk është bërë publik emri i viktimës.

Ai rezulton me precedentë të mëparshëm penalë. Megjithatë, mediat shkruajnë se do të vijojnë ekzaminimet për të zbuluar nëse trupi i pajetë është me të vërtetë i shqiptarit, apo jo.

Media greke, Protothema, shkruan se skeleti i trupit të pajetë u gjet në një distancë prej 8 metrash nga rruga. Dyshohet se personi në fjalë është vrarë dhe më pas varrosur me shpresën se nuk do të gjendet kurrë.

Ekzaminimet po vijojnë për të zbuluar shkakun e vërtetë të vdekjes mirëpo kjo e bën të vështirë fakti se trupi ishte shumë i dekompozuar.

Ndërkohë media të tjera raportojnë se dokumentet u gjeten në veshjet e viktimës. Sipas vradini.gr, ato i përkasin një 45-vjeçari i cili ishte arratisur nga burgu në Patra.